പ്രൊപ്പോസല്‍

ഇതാ എന്‍റെ കത്തുന്ന നഗ്നത!

അസൂയയും

ആര്‍ദ്രതയും 

വഹിച്ച് തളര്‍ന്ന ഞരമ്പുകള്‍...

സിവിലയ്സേഷന് മുമ്പേ

മുളച്ച രോമങ്ങള്‍/...

പലിശക്കെടുത്ത

പല്ലുകള്‍

ഒരു വസന്തം പെയ്തിട്ടു പോയ

വസൂരി പാടുകള്‍...

ദിശാബോധം നഷ്ടപെട്ട 

വന്യത

അടിയിലെ മണ്ണൊലിച്ച്

ആകാശത്തിലായ

കാലുകള്‍...

ഒക്കത്തേതിനും
ഉത്തരത്തേതിനും

ഇടയില്‍ പകച്ചു പോയ

ക്യ്കള്‍...

നാവിന്‍ പട്ടു പുതച്ച്

ഞാന്‍ കിടക്കുമീ

ഉണക്കമാങ്കൊമ്പിന്‍  ശയ്യയിലേക്കെടുത്ത് ചാടാം 
നിനക്കിനിയല്ലെങ്കിലീ-

യിടവഴി താണ്ടാം...

ബാധ

നഗ്നമായ് നിന്നെ വരച്ചിട്ടൊരോര്‍മ്മ കാന്‍വാസിനെ

അഗ്നി തിന്നുന്നു.

വര്‍ണ്ണങ്ങള്‍ ഹോമിച്ച് മാനത്തത് 

മഴവില്ല് തുന്നുന്നു.

നിന്നെ എഴുതിയിട്ട കവിത

മഷിയൊഴുകിയൊരു പുഴയാകുന്നു.

നീല നിറത്തിലത്

നാല് ദിക്ക് തേടുന്നു.

നിന്നെ കുറിച്ചുള്ളൊരാ പ്രണയ പാട്ടീ-

കാറ്റിലലിയുന്നു.

തീരമണയാന്‍ വന്നൊരു പായ്കപ്പലിനെ

അതീണത്തില്‍ തിരിച്ചയക്കുന്നു.

നിന്‍റെ അഴുകിയ ജഡം

തിന്നോരയിരം പുഴുക്കള്‍

ശലഭങ്ങളാവുന്നു.

ശ്മശാന പുഷ്പങ്ങളിലവ

പരാഗണം ചെയ്യുന്നു.

നിന്‍റെ പ്രേതച്ചിരി ഓരോ സ്വീകരണമുറിയിലെ 

ചായകോപ്പയിലും പ്രതിഫലിക്കുന്നു. 

എനിക്ക് ബാധ തന്നെയെന്ന്‍ ഓരോ കന്യയും

അതിനാല്‍ സാക്ഷ്യപ്പെടുത്തുന്നു.