ബാധ

നഗ്നമായ് നിന്നെ വരച്ചിട്ടൊരോര്‍മ്മ കാന്‍വാസിനെ

അഗ്നി തിന്നുന്നു.

വര്‍ണ്ണങ്ങള്‍ ഹോമിച്ച് മാനത്തത് 

മഴവില്ല് തുന്നുന്നു.

നിന്നെ എഴുതിയിട്ട കവിത

മഷിയൊഴുകിയൊരു പുഴയാകുന്നു.

നീല നിറത്തിലത്

നാല് ദിക്ക് തേടുന്നു.

നിന്നെ കുറിച്ചുള്ളൊരാ പ്രണയ പാട്ടീ-

കാറ്റിലലിയുന്നു.

തീരമണയാന്‍ വന്നൊരു പായ്കപ്പലിനെ

അതീണത്തില്‍ തിരിച്ചയക്കുന്നു.

നിന്‍റെ അഴുകിയ ജഡം

തിന്നോരയിരം പുഴുക്കള്‍

ശലഭങ്ങളാവുന്നു.

ശ്മശാന പുഷ്പങ്ങളിലവ

പരാഗണം ചെയ്യുന്നു.

നിന്‍റെ പ്രേതച്ചിരി ഓരോ സ്വീകരണമുറിയിലെ 

ചായകോപ്പയിലും പ്രതിഫലിക്കുന്നു. 

എനിക്ക് ബാധ തന്നെയെന്ന്‍ ഓരോ കന്യയും

അതിനാല്‍ സാക്ഷ്യപ്പെടുത്തുന്നു.